E ti Fernanda, te l'ee desmentegaa?

te ghe l'ee pù in del coo

el noster girasô!

Mi ghe l'hoo chì al mè coeur semper  ligaa,

coi sò foeuj giald e i sò semenz al sô,

el noster girasô!

Se se podess anmò' aveghel visin!

te see ricordet? a gh'emm avu timor...

poeu l'emm cattaa tentaa da'l sò savor.

Intorna a nun el cippì d'on passarin . .

e on ciel celest, profond, lontan, lontan

e on praa verd, tener... t'hoo toccaa la man!

La sces la s'è' impienida de farfalI,

i margarit s'hinn drizzaa in pee a guardà,

l'acqua de la ron'sgètta a cicciarà,

in lontananza el squill content d'on gall

e on papaver, che bravo! l'haa giraa el coo

intant che se pelava el girasô.

Poeu s'emm scambiaa i semenz cont i basitt,

te carezzavi, te strengevi su

per sentì i brivid che dà la gioventù.

Serom content, soddisfaa 'me duu angiolitt,

se rimiravom e insemma a cent promess

se lisciavom la pelI cont i carezz.

E tì Fernanda, adess famm minga intort

de avè desmentegaa i nost giurament

s'el destin l'haa vorsu fa diversament!

Mi voraria trovatt, per vegh confort

che la memoria la t'haa no tradì

e te ghe penset, ogni tant, 'me mi.

Che belI se se podess tornà indree!

forsi gh'è anmò i farfalI...

el squill lontan del galI...

el passarin a cippì in su'l stess senté...

l'acqua de la ron'sgetta che, sott vos,

la rincoeura el papaver vergognos.

A ghe saria ancamò quell ciel azzur

profond, profond, lontan, lontan,

e mi e ti, strengiuu in di noster man.

Tornemm indree on minutt mi sont sicur

che se el destin el premia la pazienza

podomm sentì ancamò el gust de la semenza.

Ridamel on granell de gioventù!

tornemm indré a sentigh el so savor;

l'apostrofo del noster gust d'amor...

L'è là ch'el spetta, lù.....

coj sò foeuj giald e i sò semenz al sol,

el pussee belI di pussee bej bisgio;