La farfalla (Gianni Airaghi)                                      

La farfalla

Guarda, guarda la farfalla,

l'è rivada a fà la cialla,

Ho dervii la mia finestra e l'è vegnuda

a fagh la fèsta ad on ciar de candilee

che hoo pizzaa pròppi per lee,

Guarda, guarda la farfalla,

intorna al ciar che on poo el traballa;

la continoa a girà in gir, la me fa tegnì el respir.

Scappa via...o ciel!...Signor!

Vola via da quell calor!

Te voeur dì che l'ha capii? Adèss la vola intorna a mì.

Poeu l'è ferma in sul cappell, in sù la gabbia de l'usell,

in sù el ritratt de mia miee, la se ferma in su i duu pee,

in sul mur, su ona cornis, in su on quadrètt d'on car amis.

Poeu la torna tutt'a on tratt in gir al ciar a volà me on matt.

Se podessi mì avisalla che 'l calor la pò brusalla!

E se ved, ........ l'è stracca, i sò al batten la fiacca!

La va via, la torna indree,

ma se ghe fa 'sto candilee!

Poeu l'è staa 'me 'na scalmanna

l'è borlada dent in la fiamma.

Poverina: la farfalla l'ha vorsuu fa on poo la cialla.

Adess l'è lì  tutta gremada...

colpa soa se l'è brusada!

Se dev nò insist ad on gioeugh,

specialment se quèst l'è foeugh!