|
La margherita (Gianni
Airaghi)
|
||
| Testo originale | Traduzione | |
|
La margherita
On granell de semenza, forsi boffà dal vent, o borlà-giò da on bècch de passerin - chì gh'è de mezz sicur la provvidenza - l'è capitaa in la tèrra d'on giardin.
El sô con la rosada de la sera l'hann miss al mond che l'era primavera e in mezz al verd di smerald a la mattina adree oeugg de fioeu guarden content ona coròna bianca e on pontin giald che 'l gibilla i carèzz che ghe fa el vent.
Guai a catall...bisògn toccall con cura... a l'è on miracol vorsuu da la natura! Intant ona farfalla la se decid a regalà on basin.
I fioeu fann citto. Strozzen in gola el fiaa a bocca avèrta per minga spaventalla o per sbircià se fann duu innamoraa.
Poeu se riprend i gioeugh pien d'allegria e ciaschedun el mètt a sò ris'c la fantasia.
Ma al de là del cancell, coi oeugg che sguizza pian, negher 'me 'l fumm e brutt 'me la miseria quattaa malament cont on mantell che 'l spantega in gire on sens de cattiveria, on òmm che 'l mètt timor e ripugnanza el se fa innanz e in di sò man...la ranza.
Scappen de corsa i fioeu, on temporal el tròna e fa saett, la ranza la scarliga in del tajai insèma a 'sto temp matt, temp marziroeu, senza riguard, con gust de devastà.
Quand l'è rivada visin a la margherita, on attim e poeu...zaach! Stroncaa ona vita! In mezz al verd di smerald...oeugg de fioeu magognent, lacrim pien de savor cerchen ona coròna bianca e on pontin giald, forsi, senza savè se fann, cerchen l'amor.
La ranza, egoista, senza pensà al valor che gh'ha la vita l'aveva vorsuu per lee la margherita. |
|
|
