|
Riflèss del navili
(Gianni Aiuraghi)
|
||
| Testo originale | Traduzione | |
|
Riflèss del navili (pensando alla moglie che non c'è più)
Quand el dolor in del coeur el me rosega com'el pò fà el carrioeu in d'on mòbil vecc, mì tiri-giò la clèr, sari bottega e spètti con grisor che riva el fregg, on frègg che l'è ona lama d'on cortèll che 'l me tormenta adasi 'me on scopell.
I man me se ingarbien de sudor e trèmen come avègh la fever frèggia. Maledissi el carrioeu del mè dolor che 'l scava adasi e el spong come ona frèccia, El coeur el batt gròss de malinconia e bagni coi laver la soa fotografia.
De quand che l'è partida a gh'hoo pù pâs: la nostra cà l'è voeuia come on guss. La ciami 'me ona vòlta, persoas de vedèlla spontà foeura d'on uss...poeu, quasi soffegaa del mè magon, mortificaa... ringrazi l'illusion.
Già,,,se viv de sògn e de ricòrd; se tira innanz inscì, a la bell e mej...gh'è nient de fà va ben... mì...son d'accord, ma quand se mètt in mèzz i scinivei allora te see pù come proced che l'è on miscmasc de spin...provà per cred!
L'orelògg de cà l'è semper quell... le caregava lee cont i sò man, con la mòlla pronta a scattà per el pontell de levà-sù per prima al noeuv doman. Adèss el va minutt sora minutt, ma l'è come on rammn secch nè fior nè foeuj...
Me dissedi anca mì a l'istess orari, sbatti el zerbin, i pedagn sora al poggioeu, mestee per mì bosard, ma necessari per tirà grand e onest i mè duu fioeu. E quand che troeuvi el temp de rilassass... la senti camminà e..cunti i sò pass...
Per quanti ann a la m'è stada amisa! A pari pass in su l'istèss sentee emm camminaa a brascett. Gioia e fadiga, divis insèma, precis come speziee, ............, penser, carezz e soddsisfazion emm tajaa a fètt: pesavom la porzion!
L'orelògg de la cà l'è semper quell, el batt col sò tic-tac ògni second el temp present, ma lù, senza savell, el lassa on sègn marcaa profond, profond, e quand de nòtt el sbatt i sò lancètt mòlli i lenzoeu e salti-giò del lett
e per ciappà on confòrt, trovà consili, sfogamm a piang o per calmà el dolor corri in su la spallètta del navili... Me spèggi in l'acqua in cerca del mè amor... Col sò faccion la luna vagabonda la me sghignazza adree come.....................
Rid, rid e rinfaccia pur el mè torment e balla insèma al ciar de duu lampion e i mè cavèi sgraffignaa dal sô e dal vent. Ridegh de sora pur al mè magon... Ma in la pâs scura, a ris'c de disperass, la cerchi lee e voo adree a speggiass.
Luna spariss...lassom per mì la nòtt, spariss dedree di copp di nòster tecc, voeuri sta depermì e me fa nagòtt se tradissi l'aiutt di mè duu vecc. Voeuri sta depermì...spariss...va via...voeuri...la voeuri... e stà in soa compagnia.
La luna la se invia a l'orizzont, me resta el mè naviliu quasi nètt, l'arcada ne l'ombria nera del pont e tanti stell che 'l ciappen 'me on speggett. i cerchi l'acqua curvaa in su la spallètta... i sò sembianz...Madonna benedetta!
Me spèggi e me rispèggi in tì, o navili, me spèggi e me rispèggi come on matt. Tì che te me daa tanti consili quand de fiolett fasevi on poo el malnatt stanòtt...l'ultim piesè! Tires nò indree, famm trovà in l'acqua.................de mia miee!
De colp come in del ciel fann i scalmann quand che se sfòghen insèma al temporal, me la rivedi davanti, lì, a dò spann, bèlla come ona vòlta, natural... L'è ona vision? L'è on sògn? Oppur l'è vèra? I palpeber hann mis'ciaa i lacrim insèma a la scighera.
Te ringrazi navili di mè ann indoe me son spèggiaa per vegh confòrt quand tribulavi col coeur per i tosann o quand che me andava on quaicòss tutt stòrt. Te ringrazi navili, tègnela lì con tì anmò on ciccin e poeu...rivi anca mì! |
|
|
