O fior de pèrsegh bell che in primavera
te set el primm cont i tò foeuj rosaa
che sponta foeura al sol come bandera
per anoncià che i gèmm s'hin desedaa,

che la somenza in de la tera nera
cont i radis che bujien soteraa,
truscen, se sbaten su ona gran balera
desiderand el calor de l'estaa;

o pèrsegh bell che primm cont i tò fior
te sonet i campann de la stagion
che sberlusiss con tutt'i sò color,

che canta a tutt el mond Resurezion,
dimm quell che'l coeur l'aspeta a tutt'i or:
se l'è per mì resuscitaa l'amor.