Se sa che l’òmm, dal temp antigh de Adamm,

de quand l’è ben nassuu sto “bell” mondàsc

(che ‘l par ‘na vera gabbia de mattàsc)

per via de l’egòismo e de la famm

no ‘l fa de bon, ‘me i besti pussee gramm,

che fregasciass cornàd in del bottàsc,

fin quand el se riduss consciaa ‘me on stràsc

onc e bisonc de mett in del letamm.

Ma col progrèss che ‘l bagna a tucc el nas

in mezz al ciar preziös de civiltaa,

l’è l’ora de distrugg tutt’i cannon

per fa trionfà ‘I princìpi de reson

de la giustizia e ‘l coeur, l’umanitaa,

col ben d’amor per mett el mond in pas.