Lenguagg nostran

Conossi ona gran scoeula de lenguàgg

doe gh' hoo imparà a parlà de piscinin,

appèna sont rivaa da on longh viàgg

che 'l m'haa dervii sora a sto mond l'oggin.

Lengua di vècc de cà, del Meneghin:

ciara espression sincera e coraggiosa,

de viv color, lustrada con sal fin;

la crapa a pòst, sui spall, e giudiziosa.

In quanto poeu al concètt de la poesìa

e al bon costrutt de idèj e de pensér

m'han ispiraa quj leg de l'armonìa

coi lumm del ciel, del coeur, di primaver.

E l'è per quest che l'è vegnuu dai stèll

el fil d'argent faa sù sul «Remissèll»

                     e «Procession de stèll »;

e adèss ghe rìven per i mè fedel

i rimm nostràn del «Fontanon del Ciel.»