On mur, on mur de sass e de cement,

on mucc d'òmen de guardia tutt'armaa

ghe fann terror a quèlla poera gent

che guarda el mur con sora el fil spinaa.

'Se gh'è de là del mur? On tocchelin

del coeur d'ògni famiglia separada

per volontà de quij che'l tò destin

el trann a tòcch per fà ona balossada.

Perchè gh'è lì quell mur che je spartiss

anben che parlen tucc a ona manera

e hinn tra lor fradej ? Ognun 'l patiss

de vess insci struziaa ma pòcch el spera.

El pensa che a 'sto mond la prepotenza

de quij che ne comanda l'è infinida

e senza nissun scrupol de coscenza

coi nòster patiment lor fann partida.

Ma adess per el Natal ona speranza

l'ha ris'ciaraa on poo el ciel, j ha faa content

e come prèmi a quella gran costanza

gh'è staa concèss de brascià sù i parent.

A mila a mila, in fila dì e nòtt,

hann dimandaa el permess de traversà

quella barriera e dopo pù nagòtt

i ha trattegnuu del corr fina de là.

E forsi tutt el mond el pò augurass

che con 'sto piccol sègn d'umanitaa

se sien inviaa a fà 'l primm pass

per incontrà la pas, la libertaa.

Che'l sia el primm pass per fà crodà i barrier

e per desmentegà quij vitt d'inferno

e regordà che insèmma, ross o ner,

gh'hemm de trovass denanz al Padreterno.

Febbraio '64