|
Mì sont on gatt (Amatore
Bianchi)
|
||
| Testo originale | Traduzione | |
|
Mi sont on gatt
Mi sont on gatt e podi no parlà, ma quand sont lì che pisoli in poltronna e foo ron-ron in scossa de la nonna, mi senti e vedi quell che fann in cà.
El capp de la famiglia, el sur Gajtan, l'è'l primm a levà sù a la mattina, el par semper invers e con la Pina, intant che'l toeu el caffè, el fà el ruspan.
El sbragia per i fìoeu ch'hinn anmò in lett, l'è burber fin con mi ma in fond l'è bon, 'l me dà ona fregatada sul fìron e'l me tira la coa per dispett
Segond a comparì l'è el gioinòtt, el par anmò indorment el strusa i pee dent i sciavatt intant che sul dedree el cerca de molamm on quaj scuffiòtt.
Mì podi no vedell quell gingioari, l'è iscritt a Legge ma el se guarda ben de frequentà, e intant col bolgiòtt pien el fà el lifròcch in gir col coo per ari.
La Titti!! Quella l'è ona gran forlinna; la gh'ha duu o trii moros, la ven, la va, ne fà pesg de Ravetta ma se sa, in cà la ciammen semper «la bambinna ».
A mì la me voeur ben, a soa manera, di vòlt la me soffega de carezz, ma se la gh'ha 'l sò petascioeu de sbièzz gh'è minga de sperà in la bonna cera.
La mamma la ven aolter vers des or, la gh'ha i cavej faa sù in di bigoditt, in mezz al mascheron se ved i oggitt che oramai hann pers tutt el splendor.
De nòtt la dis che la pò nò dormì, la vosa se mì son su la poltronna, la voeur che staghi citto poeu m'je sonna se foeura de cassetta hoo faa pipì.
La mia consolazion l'è la nonnetta quand la me ciappa in scoss la me carezza e la me parla in tutta segretezza di sò bej temp quand l'era gioinetta.
La tira foeura da ona cassettina on pacchettin de letter ligaa sù cont on nastrin celest - eren de lù - e lì intramez gh'è anmò ona rosellina.
E poeu la cerca dent, ecco el ritratt, le basa, le carezza e la me dis bej parolett, e mì moeuvi i barbis ma pòdi nò parlà ... ,,,mì sont on gatt!! |
|
|
