Veggia fotografia

Veggia fotografia de medajon,

trovada in del cassett d' on tavolin

fada sù in la velinna, on pacchettin

fognaa con tanti robb in d'on canton,

mì, t'hoo scartada on poo cont emozion.

Dent in de l'ôr, rideva on bell faccin:

cara memoria d'on tirann destin

che in del vardalla m'è vegnuu el magon.

Quand l'era in vitta, l'era l'alegria:

on turbin, el sò andà; svelta 'm'el vent.

Quand gh'era lee, gh'era la poesia:

se pizzava de stell el firmament.

Poeu, gh'è finii tuttcoss, ona mattinna...

adess, de lee, on pacchett in la velinna.