Stanza senza servizzi (Carlo Pierotti)                                                                         

Stanza senza servizzi

Sarà colpa del progress; sarà perché, adess, gh'emm i servizzi "privati" e ona vòlta, inveci, gh'i avevom "promiscui" in fond a la ringhera o in cort; sarà perché adess gh'emm el bagn còmod, con tutt i piastrell bei luster, con su i fiorellitt coloraa; sarà perché te see lì bell còmod, settaa-giò come in poltròna e inveci ona vòlta te toccava sta lì in scruscion per tutt el temp, che, se dininguardi, te se movevet on ciccin pussee o, per combinazion, te ciappava el ranf in d'ona gamba, gh'era el pericol de andà a sbatt i quart dedree in del bus de la ganga e de dovè ciamà aiutt a on quai vesin che el vegniss a desgroppat foeura; sarà on poo tusscòss; sarà che semm diventaa smòrbi; soo nò! Resta el fatto che adess, mi, riessi pù a fann a men de certi comodità!

Insòmma, foo fadiga!
Mi, tutt i vòlt che in d'ona pension, m'è capitaa de 'vegh ona stanza senza servizzi, l'è stada come se me mancass on brasc.

Perché, oltratutt, se l'è vera che gh'è on certo vantagg econòmich su la retta de la pension, l'è anca vera de quell che bisògna spend per vess minga ridicol in del corridor quand, mezz indorment, te vee da la stanza al bagn. El vantagg el va in fumm!

Prima ròbba, ghe voeur on pigiama complett con giacca e calzon e, dato che de sòlit, gh'è quii che dorma o domà coi calzon o domà con la giacca (mi, per esempi, dormi domà con la zentura perché me pias sta in sorioeula!), e prima de vegnì foeura de la stanza gh'hann de fà la vestizion come i mònegh de prima nòmena.

Mi, de sòlit, metti sù ona vestaglia de seda "modello japan" (sì, insòma, quii vestalli on poo pussee curt di alter, coi manegh a pedrioeu e cont on "drago" pitturaa in su la s'cèna... ), quii modei che adess "piacciono un casino" e fanno tanto "figo". Insòma, el pigiama e la vestaglia hinn tutt spes in pù che te devet sopportà e che te ne farisset volontera a men se te gh'avesset i servizzi in stanza.

I sciavatt, per esempi, ecco, i sciavatt, anca quei te tocca comprai noeuv. Te podaree minga girà in di corriddor de la pension con quei sciavatt scalcagnent e giò de tacch che te pòrtet semper a cà (che tra l'alter hinn insci còmod!).

Insòma, tutt spes in pù!

E l'è minga fenida. Mi, per esempi, che sont on poo dèbol de vessiga, son stuff de seguttà a fà i me "bisognini" denter in del lavandin, tutt i vòlt che troeuvi occupaa el "bagno in comune". Son stuff de mett su la dentera tutt i vòlt che voo in corridor per avegh on aspett dignitos se te capita de incontrà on quaidun...

E poeu, gh'è on'altra ròbba, va beh, on ciccinin personal, ecco disemm. Mi, per esempi, sont on orelògg per certi "funzioni fisiologiche" ma, quand son dent in del bagn, se gh'è on quaidun ch'el segutta a menà la maniglia perché, pòer crist, el gh'ha ona certa urgenza anca lù... mi, me incarognissi a on ponto tal che riessi a fa pù nanca el minim necessari, anca se la sera prima hoo mangiaa i brugn còtt pròppi per quell.

Mi, fòrsi, saroo on poo tròpp faa a la mia manera. L'è nò che sia on scior, ma a la stanza coi servizzi, mi, ghe rinonci pù.

Puttòst resti a cà mia.

Ecco!