Che stella, che tesor l'è el mè pattan!
Ormai la dis polid mamma e papà,
la fa ciao, ciao, la tocca sù la man
e la va intorna senza topiccà.
Quand el mè Enrico el torna de l'offizzi
e che stèmm lì a specciall sul poggiorin,
lee la tripilla, lee la fa i caprizzi
pur de corregh incontra a fa el basin.
A tavola, settada in cadregon
e in mezz a nun, la fa la smorfiettina;
la voeur che la se imbocca, ma, on boccon
del sò papà, e vun de la mammina;
tant, che, in la smania, ne succed de bon
de dagh el broeud... drovand la forcellina!!