La polenta

Tosa del Sô e de la soa morosa

la Terra (che in pòcch més la picca lì

loeuv a centenn de milla) - legriosa,

gialda l'istèss de l'or, - eccola chì

calda, su la baslètta, - gremolada,

fumanta, tramandant on odorin

ch' el guzza l' appetitt... (ah! che pacciada

vuj fann!!!) - Sà on fil de reff... Ecco, on fettin...

(on fettin?.. on fetton!); dent... e ch' el nega

soffegaa in del att pènna mongiuu!!!

Poeu on'altra fetta, che la quatta integra

la mia fondinna; e, soravia, on cazzuu

de poccia, e on'infilada d'usellitt

voltiaa in l'erba savia e in la panscetta...

Infin, per compiment, duu o trii fettitt

de stracchin tutt a boeugg; oppur 'na fetta

de Gorgonzoeula, de quell verd, piccant;

dò dida de Barbera e on bon caffè...

E mi, con tì, - POLENTA - stoo d'incant,

sagoll e soddisfaa, mèj che nè on re...

(de quèj col cuu pezzaa e cont foeura i pè!...).

Milan, el 20 Settember del 1926.