|
El treno di vòtt e cinquantasett
Ferragost, Milan indorment, la Nòrd quietta e mi pront: binari quatter.
De chi vedi la gent rivà apos la biglietteria e scolti; on queivun el
cognossi de tanto.
El Peder cont el Pepp hinn semper i primm a rivà. Vun portinar, l'alter
ortolan. Ferragost: ai tempi, l'era l'unich dì de festa per lor e con
fioeu e miee 'l passaven in sul battell. Quand i fioeu oramai cressuu
hinn andaa per cunt sò, lor hann seguitaa l'usanza. On ann gh'è mancaa
la miee del Pepp, l'ann dòpo quella del Peder.
Al pontell hinn rivaa domà lor duu.
« Ciao Peder, tutti ben i fioeu? »
« Ben, e i tò? Prepara la carta in man, se de nò quell là el te fa nò el
scunt. »
« Ghe l'hoo, gh'hoo anca el giornal, l'uga e i per, perché lor te dann
el gelato al pòst de la frutta. »
El Felis el va in de la sorella, suora a Bellagg. El Felis, 'na vita in
banca, dònn on mucc, nessuna sposada. Mettuu a ripòs ma ancamò giovin,
ben vestii, abbonament a la Scala e al Manzon, quatter amis, on dì chi,
on dì là. Ma Ferragost nol se tocca, ghe l'ha promettuu a la mama, se
va da suor Bambina.
Te lì ch'hinn bell e rivaa la Rosetta, la Clelia e la Mariuccia. Circolo
De Amicis, patii de briscola.
« Rosetta, t'hee portaa i cart? »
« Sì Clelia, e anca l'aranciada. »
« La sòlita stamegna! »
« Oei cara, in sul battell la costa el doppi, e per mì, anca se l'è Ferragost, la pension l'è semper quella. »
« Mariuccia, 's' te gh'hee? Te see vegnuda giò del lett cont el pee
sinister? »
« Sont inversa perché l'è di cinqu or che son dessedada. »
« T'hee sbagliaa a pontà la sveglia? »
« Macchee sveglia! L'è colpa de chel arabo
ch'el sta de sòtta. Per via del fus orari e per sparmì i danee, el ciama
i sò a la mattina prest e, salamid, hamabel, katadum, salamel, l'è andaa
avanti mezz'ora. Mi che ronfavi de la quarta hoo creduu in sògn de vess
capitada in d'ona tribù de beduitt e me son stremida tant, che son stada
bòna pù de dormì. »
Semm inviaa polid, chi se cicciara a roeuda.
Riven el Luis, miee e Giancarlo, varda come 'l s'è slongaa!
El Luis l'è autista ai "Trasporti Grillo", tutt l'ann a portà
camion, e ai feri el voeur nò saveghen de guidà. Vann a Argegn a pesca.
La Òlga e la Vanda hinn lì ancamò al bar a ginginà. Tinta rifada el dì
prima, berlinghitt on poo in depertutt, zòccor col tacch. Laoraven in
vial Majno...
« Tosa, prepara la carta d'identità se de nò quell lì le fa nò la
riduzion. »
« Te gh'hee reson, quei che gh'emm je dimostrom minga! »
Se la va ben sgarbelarann via la crociera, la colezion senz'alter.
Vedi nò rivà la Marisa. La miee de l'avocatt l'è bell'e lì. Alta, mòra,
vestii e giacca de seda bloeu a ramasg bianch, scarp e calzett negher,
guant de pizz e veletta, semper, anca a trentacinqu a l'ombra. Questa
l'è ona stòria longa.
La Marisa l'era la segretaria de l'avocatt, bell òmm, studi in sul Cors,
villa a Cernòbbi. La miee la passava la stagion a la villa e lù a Milan
el se consolava con la Marisa, giovina e de coeur che la s'era lassada
lusingaa con discors de divòrzi e alter promess.
E intanta i ann passaven e per l'avocatt gh'era rivaa el so moment,
pròppi a Ferragost e pròppi a Cernòbbi.
La Marisa, oramai cont i man in pasta, l'era passada col studi al Giovin.
Mònolocal a Milan, comproprietà a Rapallo, on quai amis. La miee adess
la stagion le passa a Milan perché la villa la ven fittada. Se sa, i
ghei fann semper còmod e poeu con la svalutazion... Però a
l'anniversari riven tucc dò, on sorris de circostanza, on salud fin
tròpp educaa, on bell mazz de fior e basta.
La Marisa tutti i ann 'na camisetta noeuva, la gh'ha pur de rifass.
- Ecco la Cesarina cont el nevod grand e gròss e bon 'me 'l pan, scarp de
ginnastica compraa e infilaa lì, sul piazzal.
El gh'è restaa in del goeubb a lee, pòera dona, vera che l'è fioeu de la soa tosa, 'na senza coscienza mal
maridada, ma lee la ven veggia, gròssa e ghe manca el fiaa.
« Varda che l'è l'ultim ann che vegni, giusta perché voeuri vedè la funicolar noeuva. »
« Sì, però anca mi te compagni in San Lorenz quand gh'è la festa e
brusen el
balon! »
La famiglia Refusini la gh'è al complett. Gh'hann el "mutuo" de pagà e
tutti d'accòrd: « Vacanze a Milano e dintorni ».
« Marzia, passom i Pink Flòid. »
« Toeu, ciappa, mett su el Vasco. »
« Luca, tacca nò a inciocchimm col tò stereo, varda puttòst de minga
desmentegà la borsa cont el disnà! »
La Giulia cont el Fabio, sfrattaa, e in albergo, pòden nò moeuves
perché spetten l'assegnazion. Ma incoeu i ciamen nò de sicur. Gh'hann la
Marta, on scigollin de trii ann che subit la diventa la cinciapetta de
tucc.
Riva vun in sciavatt e canottiera, l'è pront per la spiaggia.
Ghe semm tucc?
On para de "voo comprà" e in fond, mettuu là che paren de sbatt via, gh'hinn
anca duu balord. Come gatt vagabond suefaa a ciappa pesciad, se te ghe
slonghet on quaicòss se tacchen come sanguett.
Su svelt che l'è ora!
Se sent odor "de metrò dòpo la Stramilano", on quaivun che parla de
repolisti... musica che va su de volumm... frecass de pòrt che sbatt...
fis'c del capo... via!
Quanti Peder, Felis, Luis, Vanda, Marisa, Rosetta, Giulia in ógni
scompartiment? E intanta che decidarann se famm passà de sòtta o se
slarga dessora, mi per l'istessa strada pòrti a spass tutta sta gent e
son content.
Tu... tuuuu... frin... fran... frin... fran... frin... frin... frin...
frin... frin... frin... frin... |
|
|
