L'esit (Pina De Marchi Dell'Acqua)                           

L'esit

Autobus 93 Piazzal Gorini,

Via Venezian numer vun.

In mezz la sala i piant verd

gh'hann el sò brisin de terra umida,

da on tocchel de ciel on sô sbiavii

el gibigianna on lucernari.

Tutt'insema el sarìa anca bell

se chi je varda...

el fudess lì domà per quell.

Sala E. Come esit.

Quatter donn, on para de omen

duu bei fiolitt. Perche questi? No!

Riven de lontan, se capiss dai valis.

Gh'hann anmò la nott in di oeucc

pien de sonn, saria mej de sogn!

Cadregh comud, tavolin, giomai in gir,

intoma bell nett.

"Mì - la dis voeuna - l'è la terza volta che vegni chì,

finadess l'è semper andada ben."

On omm el salta-sù:

"Mi, seri giamò spacciaa, me l'hann fermaa

in del brasc quell che gh 'hoo pù.

"On' altra, come mì, on gandolin

par de sciresa , propi chì.

Passa on pret, in prèssa el benediss.

Ohè! Disi, come el sariss?

Femegh i coma, scarliga merluzz!

S'hinn indormentaa i fiolitt, che bei faccin,

duu angiolitt. Beata innocenza

che la sia minga dura la soa sentenza.

Dervi e poeu sari la borsetta,

cavi e metti-sù i oggiai.

Vun el rosega i ong, on alter

el s'cinca el bigliett del tram.

I orelògg... gh'hann domà che l'ora, tutt'istess.

Come i noster oeucc, tutti,

gh'hann la stessa cera di chi polaster

che 'l temp de guerra, me mader la tirava sù per i fest

e che mi nanca saggiavi.

"Signora P." ciara la vos de l'infermera.

La mia on poo men: "Son chi."

"Si spogli ed entri lì".

Con la cartella in man, on dottor el va dree a parlamm

"Cara signora, sa, francamente le dovrei dire...

"L'è chì in de per lee?"

"Sì, scior dottor, ch'el disa pur...

"Senti pù nagott, i mè penser van via legger

E mì pussee de lor leggera

me tiri adree i mè amor: marì, fioeu, genitor.

Ridi: "Ch'e! disa, ch'el disa pur."

"Signora Maria P."

"No, ch 'el me scusa, mi son Pina D."

"O scusi, non è questa, non è la sua cartella.

'Se la fa? La piang adess

che gh' è a post tusscoss?"

"No! Piangi nò per mì,  piangi

per quella che l'ha ciappaa el me post"

1° premio al Concorso Nazionale "Europa donna: Il prima e il dopo"

21 marzo 2000, Teatro Filodrammatici, Milano