Se dobbia l'erba alta e verdesina
denanz a sto gran Rè de la stagion.
L'aria la sa de menta e limonsina,
e hinn vestii tutt de verd i bej pianton.

Scorlen i moneghin i campanèll
per dessedà in d' on bott tucc quanti i fior:
- Avanti, riva el mes el pussèe bell;
sù tucc insèma incontra a fagh onor! -

Passa el Rè Magg in mezz a bej giarditt
de gardèni, de rocus e de botton;
in ciel l'è tutt on sgorà de uselitt

che cippen ciaschedun la soa canzon.
Maduren già magioster e scires,
se slonga la luserda al sòl del mes.