Balonitt de savon

On fiolin sul poggioeu de facciada

el boffava ballon de savon

che volaven sù in ciel e giò in strada

dondinand come fa l'aquilon.

Gh' era quej con la gotta giò in bass

mes' ciaa insèma a di alter, legger.

Chi borlava giò in terra 'me i sass,

chi volava sù in alt 'me i penser.

A vedè dondinnà 'sti balon,

ricordavi quand seri on bagaj:

un poo d'acqua e dò schej de savon

e content mì 'me on ratt a boffaj.

Cont impegn, tanto amor e passion,

in de quej che volaven in ciel,

ghe affidavi 'me fuss 'n'orazion

per Gesù, desideri e on penser.

Ballonitt che la pòvera gent,

cont i cruzzi, coi sògn e i penser,

ve boffaven per mettegh dedent

i speranz che volassen in ciel.

Ballonitt de savon sberlusent,

pien de lus e rifless coloraa,

che portee in del me coeur godiment

e on soris ch' el me lassa incantaa.

Sont convint che on quejdun l'è reussii

a rivà fina sù in paradis,

se anmò incoeu, ormai vecc e ingrisii,

quell ricòrd el me inspira on soris!