L'acqua la cunta (Ella Torretta) 

L'acqua la cunta sù
i cruzzi d'ona dònna
scrusciada sul brelin
cont on fiolett vesin
ch'el fa spegasc coi lapis
su foeuj, tocchei de carta,
ritaj de cartonzin
per soddisfà la voeuja
de sigellà impression,
vision rifless in l'acqua
de dònn, come soa mader,
che freghen col palton
vec tòni de meccanich
pesant, lis e voncisc.
On scior el passas arent
“Che bei disegn...hinn tò?”
“Sì.. ” “ Voraria comprai! ”
La mamma la straluscia
e borla dent in l'acqua
i pagn, savon, spazzetta
che vann 'dree la corrent.
Ona sera de settember
el fioeu, ormai pittor,
el torna su la riva
insema a la soa sposa
per fagh sentì la vos
de l'acqua cicciaretta
che ancamò la cunta
la storia d'ona vita:
...ona mamma lavandera,
on scior benefattor,
e lù, dopo i spegasc,
Artista de cartell!

24 maggio 2003