Mi sont el spazzacamin pinin pinin...e innanz a lor inscì bei, inscì grand, inscì sciôr, me batt ol coeur come on usellin che sent la s'cioppettada...

Ma pur sto coeur al batt, al dis: parla, piscinin, cunta su chi te set, dove te vet, dov te doeur-al dis ol coeur.

Mi son ol piscinin che va per strâa a vosà: «spazzacamin». Gh'hoo i scarp rott, i gamb biott e adoss on strasc d'on gipponin che, Gesù bambin! al manda foeu di boeucc ca paren oeucc.

Sont nassuu lontan lontan cent mïa de Milan, e in sto dì de Natal sont come on can, senza la mamma e senza ol pà, sont chì sol a guardà i olter che gh'hann la mamma, ol pà, la cà; e pensi al mè campanin, mi poer spazzacamin, pinin pinin.

Lor sciori hinn staa tant bon de dimm: - Ven chì, scoldet, piscinin; mangia on tondin de risott; toeu on tocch de manz, de pan, de panaton. Scoldet, quàttet, bev on gottin de vin a cunt de quell Bambin, che l'è nassuu anca lù pinin pinin.

Grazia a lor sciori, grazia - Gh'al disi col magon che sa de panaton.

Grazia a sti bei sciorinn, che me paren angioritt, che gh'han portaa regaj e regalitt.

Grazia a sti car bagaj, che gh'han portaa danee, palpee, regaj.

Grazia a sti benefattor e grazia anca al Signor, che gh'ha miss in dol coeur on pensierin pel poer spazzacamin, pinin, pinin.