Finalment t'emm rivista, o Madonnina,
dopo gran temp de cruzzi e tribuleri!
Oh, quanti volt ne l'ora del magon
emm guardaa in sù, per vegh ona speranza,
ona speranza almen de tì, o Madonna,
tenera Mader vers i tò car fioeu!
T'hann imbottida cont on mucc de strasc
e l'è staa mej inscì: i tò Milanes
voreven nò che te sentisset tì
al strazzi di siren e'l bordeleri
di cà sconvolt dai bomb e traa in freguj;
voreven nò che i tò bej oeucc pietos
vedessen tant disgrazzi e tant dolor!
Oh, n'emm patii, Madonna, n'emm patii!
Sora Milan, intant che nun piangevom
i fioeu su tutt i front mandaa al macell,
ona tempesta orribil giò dal ciel
scaraventava e piomb e ferr e foeugh...
Quanti mai fiamm nel ciel invernighent!
La pareva Milan ona fornas,
ona fornas immensa che brusava
con rabbia e con furor tutt i nost ben!
E, se come tutt quest el fuss nagott,
tanta povera gent che in cà, in di strad,
de salvà cercava almen la pell,
l'è stada massacrada e fada a tocch.
Nel sangu i emm vist coi gamb stroncaa e la faccia
che la faseva piang chi ghe guardass!
Se gh'emm de dì di noster pover Mamm?
I hann tiraa foeura di cantinn, già mort:
brasciaven sù anmò i sò fiolitt
in on tener ampless, come chi in vitta.
Emm vist i pover Mamm di angiolitt
che in la scoletta quietta de campagna
la Mort l'ha ranzaa via in on balen.
Vedej quij pover donn che, disperaa,
ciamaven i sò fioeu, strusand per terra;
speraven forse che col so sgarrì
quij creatur dervissen i oeucc anmò!...
Madonna santa, quanti robb mai brutt!
Quanta desolazion, quanto dolor!
Ma incoeu se sugom i oeucc e piangiom pù.
Quel che gh'è staa, gh'è staa; ghe l'emm nel coeur;
ma'dess se sentom fort e semm seren,
perche anmò te guardom tì, o Madonna,
risplend dorada in scima al noster Dom
in la gloria del ciel primaveril!...