La bombonera (Francesca Giussani Ornago)   

La bombonera

In di cassett tarlaa del mè trumò
-'na cara e veggia gloria de famiglia
del mè salott in stile rococò -
visin a la poltrona de sceniglia
tegni guarnaa 'na fera de memori,
on campionari de malinconía,
i scampol bei e brutt de tanti stori
e de quell temp che in pressa l'è andaa via:
'na scatola cinesa col crespin,
on "carillon" con sù la ballarina,
on bell speggett d'argent col pettenin
e on braccialett de perla e acquamarina;
quadrett, fotografii, cianfer, ritratt ...
la mia mama, el papà e mì popola,
ona pigotta con duu oggitt de gatt
e cont el scossarin per andà a scola ...

On naster... el primm valzer, el primm ball...
el botton d'ona rosa desfoiada,
ona collana verda de cristall
e ona tovajetta ricamada.

La borsetta de seda per la Scala...
arii d'amor, de mort e de passion,
sciori e sciorann, cont el vestii de gala
e mì che caragnavi sù in Loggion...

E in fond, quasi sconduu in d'on cantonin,
faa denter ancamò in la soa velina
ligaa col naster troeuvi on pacchetin,
la carta refignada e on poo gialdina.
Profumm dolz e sutil de paradis,
sospir d'ona lontana primavera,
fiorelítt bianch insèma coi benis.
e, fada sù in d'on vell, 'na bombonera.

Hoo mai guardaa de dent quel scatolin,
quell temp, quell dì... voeuri desmentegall
e cont on sgrisor sari el cassettín
e 'l lassi lì ancamò senza toccall...

. . . . . . . . . . . . . . . . . . . . . . . . . . . . .

Percbé l'hoo mai dervii quell pacchettin?
L'è per fà mostra de minga savè
ch'el nomm che hann scritt sora quel cartonsin
stampaa de fianch al tò... l'è minga el mè...