|
|
||
| Testo originale | Traduzione letterale | |
|
L'era on
dì come on alter. Ravanavi
in l'armadi per cercà on
tocchellin de foeudra, on scampolin de fagh el
pedagn noeuv a la pigotta. La mia
tosetta, furba 'me 'n ciappin, la se
strusava adree tutta morgnina: "El
voeuri come quell de la toa foto che te
tègnet guarnada in del ciffon!" La
slargava i brascitt de lattimel. ... Come
quell de la foto... Vola la
guggia, volen i penser su la
stoffa leggera 'me 'n parpaj, el temp el
slisa indree. Pareva jer; correvi
giò di scal, scarpett in spalla, la musica
in del coeur, gamb che smaniava, spinazzina
a incontra a
la passion che me smangiava... Dì del
'Passo d'Addio' orchestra
al gran complett, sera de gala. Sciorann
in gran 'toilettes', sciori in marsina e mì in
d'ona nivola de lus e mì che
dervi i âl 'me ona farfalla... I sò oeucc
che me guarda in d'on canton e che me
sfioren dolz, senza sorrid cont i
laber strengiuu: gioia o magon? In man
gh'hoo l'ass de fior e l'ass de coeur, cosa
decid, Signor, cosa scernì cosa
lassass indree senza morì?... . . . . .
. . . . . . . . . . . . . . --
"Dormen i mè tosann? La soa vos
in su l'uss; l'è rivaa a cà, la
giornada a bottega l'è finida. - "Papà,
guarda che bell el 'tutù' rosa"- El resta
lì on moment come incantaa e con la
man el carezza la vestina e poeu el
me guarda, ... come vint ann fà.
|
||
L'ass de coeur
(Francesca Giussani Ornago)
