il 5 gennaio 1821 si spegneva Carlo Porta, i cui ultimi istanti di vita

sono qui poeticamente evocati.

. . . . . . . . . . . . . . . . . . . .

Man che tastona in del scur,

che se sconden, sparissen,

sgraffignen  i mur,

se branchen  ai crep

de la vita madregna,

cont i ong che se s'ceppa

e rosèghen el temp.

Man che se derven,

balanzen  su l'onda del voeuj, 

se tacchen ai scoeuj

di speranz che caragnen,

come i risc coi besej.

Hin desmila i basej

de sta lodra, Carlin,

e ghe voeur dusent'ann

per capì, per cantà.

Oeucc che hann guardaa

el mes'ciozz di travaj, 

s'hin saraa

per nascond el dolor

fognattaa in del moisc: 

cosa véden adess?

T'hee ballaa, bestemmaa,

t'hee riduu, t'hee vivuu,

e intant lee  la spettava

lì postada  sul tecc.

Quarantases ann

te gh'avèvet, Carlin.

Quarantases ann.

. . . . . . . . . . . . . . .

Man inranghii sul lenzoeu,

Crocefìss  sul tappee.

Cossa veden adess

i tò oeucc?

Tas el talent e la vos

e sona i campan.

Tastonnen pù i man in del scur,

roséghen pù el temp.

On boff  e l'è scendra.

Che silenzi, Carlin.

Che silenzi.

Ma desott la bornis, 

intanaa,

gh'è i barbaj  di lugher.