La tavola rotonda

No 'l pò de cert che perd la trebisonda
Quel tal che derva la television
S'el sa che gh'è ona tavola rotonda
De gent che dev ciappà di decision...
Ma el cred de 'vè imbroccaa l'onda sbagliada:
La tavola rotonda l'e quadrada!
(Però, se l'è probabil che ghe sia
Fra quel bordell de gent che gh'è a la Rai
Di tipi che sann pòcch la geometria.
Ma, al dì d'incoeu no gh'è che tollerai,
Pò dass che vun de quist, per fà carriera
El disa "cubo" a quell che l'è ona sfera).
Ma i ròbb hinn tucc a post; l'onda l'è giusta.
De fatt gh'è di personn ch'hinn 'dree a discutt.
Ma l'è la discussion che la disgusta:
Parlen de tass, de dazzi, de tributt...
Tant ch'el brontolla: " Quisti chì hinn adree
A spellagh viv 'me San Bartolomee! "
El fa attenzion per ogni cicciarada:
Gh'è quell che parla con la pippa in bocca,
Gh'è on lendenatt che dà ona rebeccada
In manegh de camisa; gh'è on pedòcca
Cont on barbon de mutt che voeur compett
Con vun che fumma mocc de sigarett.
Ghe n'è trii o quatter d'alter che però
In de la discussion varen nagott;
Se ved che voeuren compromettess nò
E resten lì che paren di marmòtt,
Cont el coragg de dì on quaicossorinna
Domà se tocchen l'argoment "benzina".
Quii che discuten scambien parolasc...
L'è tutt on desquattas rògn, altaritt
On rinfacciass l'un l'alter di viziasc...
Però a la fin con grazia de angiolitt,
Sicur de 'vè risolt tuttcoss polit
Succeed che tutti s'cioppen foeura a rid.
E quell che l'ha scoltaa sta discussion
Quand poeu l'ha vist el moeud che l'è finida
No'l pò che tirà anlù 'sta conclusion
Dettada dal sò coeur con 'sta sortida:
"Quand se ved certa gent fà ona ridada
L'è cert che la madura ona stangada! "