L'era inscì bella ier!

In San Giovann in Conca numer duu
Lì gh'era el sit in dove sont nassuu
In d'ona sera de la fin de Autun...
D'on poo d'ann fa: del millanoeuvcentvun.
Se perdariss del temp incoeu a cercà:
L'è tutt cambiaa: gh'è nanca pù la cà!
Ghe tegni a dill: nassevi a poos del Domm,
Quand vareva on quaicoss vess galantomm!
Milanes, 'me sont mì, de quatter quart
Cont el papà del Borgh de San Gottard
E la mamma de Mont Napoleon,
Podi dì che la mia generazion
L'è per Milan, de quella certa razza
Ch'è semper pussee rara in su la piazza.
A Milan sont cressuu, sont staa educaa,
E a Milan, se capiss, ghe sont taccaa!
Hoo trepillaa per tutt i sò progress
S'era orgoglios de tutt i sò success;
E a chi diseva che Milan l'è brutt,
Ghe respondeva: «Ma per mì l'è tutt!»
Hoo semper rispettaa i sò tradizion:
Natal: pollin s'intend e panatton;
San Giusepp: gran pacciada de tortej;
La panera a San Giorg, col pan de mej.
Santa Luzia: castegn cont el vin fort;
Scisger e tempia a less al d' di Mort
E al dì de Sant'Ambroeus, de andà a la fera
Di Oh bej oh bej! l'era l'impegn che gh'era.
A San Steven: la prima de la Scala;
A carnaval, el gran veglion de gala,
Per minga tirà a man tutt el frecass
Di mascarott in piazza al sabet grass.
Ma soratutt, quell che me entusiasmava
L'era vedè ch'el mond el ghe invidiava
Perchè, ancamò pussee d'on vin che buscia
Milan l'era l'emblemma de la truscia;
L'era la capital del lavorà
L'era la Mecca finna a on poo d'ann fa!
L'era l'allevament di asnitt de soma
Ch'hann faa sù insemma el capital de Roma...
Fin che on brutt dì ona massa de lifrocch
Milan me l'hann traa a terra a pocch a pocch
Sicchè è rivaa el moment che hoo ciappaa sù
E sont andaa, che ne podevi pù!
E adess che l'è on quai ann de che sont via
Pensi a Milan, con tanta nostalgia.
Minga al Milan de adess, borgh de nissun,
Ma al mè Milan del millanoeuvcentvun!