Avanz d'on secol passaa

Sont on avanz del secol ch'è passaa!

Come sariss a dì: on « sorpassaa ».

Me vardi in gir... Del croeusc di mè compagn

quanti ch'è mort!... Me palpi in di mè pagn

per capì se ghe sont propi ancamò...

Sì, ghe sont... taroccaa... ghe sont però.

Scolti el coeur. EI battaggia senza sducc.

Proeuvi i rodell del coo... Quij giren tucc

compagn d'on orolog de marca bonna.

E allora? El g'ha reson chi me cojonna

a damm del « sorpassaa »? No. In sto carcass

senti el secol d'adess, ch'el marca el pass,

e ghe tappasci adree. Fadighi on poo,

ma domà per i gamb, minga in del coo.

Vedi i ròbb noeuv e resti lì incantaa,

per quell besej del mè secol passaa

che l'era faa per critegà tuttcoss;

ma poeu slonghi i gambett e salti el foss

del secol noeuv e tiri longh el fiaa...

Giuradinna! Sont minga on « sorpassaa ».