Quanti hinn?..Quarantatrii e mezz

Son nassuu in sto bell Paes,
in del buj del cald: vintott
luj vottcentsettantases,
sott'al Carmeen. Soo nagott
de sto facc, foeu che hoo faa in pressa
a trà on sguàgn in mezz ai Sessa.

Quand se sbaglia a bottonà
per 'na svista el primm oggioeu,
a indrizzà se gh'ha bell fa...
gh'è lì semper 'n'orbisoeu
d'on oggioeu, senza botton,
deslippaa, camuff, mincion.

L'è che mì... ghe foo scommessa!
quell ciappin d'ona comaa,
forsi a cunt de la mia pressa,
l'ha de avè proppi saltaa
in di oggioeu del gipponin
quell in alt d'on bottonin;

e inscì in sbiess on coinell
l'è vanzaa a quattamm la crenna;
e 'l cavicc, lott lott, bell bell
el m'ha subet voltaa s'cenna,
credend forsi, sto linoeucc,
che mi fuss...senza quell boeucc.

Seri el terz de la nidiada,
tant 'mè a dì: la perfezion.
Ball!...O minga, o ona rosciada;
e, credend ai mennabon...
nass in tredes tabalori:
quatter femen, noeuv mas'cioni.

Quell sant omm d'on mè papà,
(stoffa bonna, razza sanna),
el viveva per sgobbà
vott giornad la settimanna;
tutt per nun, cont el penser
de fà a penna el so dover.

E pur tropp, propi in del mej
de l'etaa, quand el podeva
finalment regoeuj di ghej,
el Signor le regoeujeva
Lù, madur al so destin,
per el premmi senza fin.

Gh'en po vess milla e pussee
de volumm in libreria,
ma gh'è nò la fras assee
de dì quell che voraria,
'dree a quell'omm de...devozion,
gratituden, affezion.

Che, se in mì gh'è on ciccinin
de onestaa, de sentiment,
de talent, pontili...in fin
mì gh'el devi ai mè parent:
a mia mamma, anca si, tant,
ma pussee ancamò a quell sant.

E l'esempi pù perfett,
che m'hann daa mamma e papà
l'è quell voress ben quiett,
l'unech ben, che pò durà;
e, del rest, tusscoss v'hoo ditt,
quand v'hoo ditt ch'eren cusitt.

Ben per colmo de sfortunna,
quand piangevom sul papà,
l'è fiorida anmò ona cunna...
Gh'emm faa ciera, quell se sa;
ma pensee...vess de per lee
ona mamma in sti pastee!

Seri alora on pivellott,
vun de quij, che va a Pavia
per l'oss bus cont el risott,
per fà el ciall in ferrovia,
per ronfà, dopo magnaa,
sôra al codes sbarattaa.

Seri...on stupid, come adess,
pien de bonna volontaa
de varì on quajcoss, de vess
padron spotech del mercaa...
ma che, in quella de trass foeura,
el fa el voll...d'ona tegnoeura.

Me regordi che quell dì,
che, rivand a la stazion
de Milan, hoo poduu dì:
- Gh'hoo el brevett del...bagolon,
in utroque son dottor!
'na pesciada ai professor!

L'Universitaa fenida!
sont... - Coss'è poeu?...Adasi, pian,
'se ve importa sta sborida
d'on mè orgasmo inscì lontan?
E chi l'è che ve incadenna
a scoltamm? La pergamenna

cont el boll papiott per ari,
con la firma del Rettor
e on spegasc del Secretari
in di ghirigori a fior
e la datta pussee sott:
«quatter luj del novantott»...

per mì l'era el primm basell
de la scara di mè sogn.
E chì inscì, come a on fradell,
perdonem, ma gh'hoo besogn
de cuntavv el mè secrett,
perchè 'l soo che sii discrett.

Seri cott...de mia cusinna,
on bell tocch de morettonna,
Sessa anch lee, 'na popolinna
com'el so, 'na tosa bonna
come...inutel divv pussee;
l'hoo scernida mì?...l'è assee!

E inscì... truscia! Per Natal,
tacchegh là on «procurador»
sul beliett (passaa a Casal
per el bus del sorador);
poeu, sgobatta de acident...
e «avocatt», april noeuvcent.

Cinq mes dopo, se sbaratta
el mè offizi in via di Piatt;
i client?!...fan a regatta
a scappà de sto avocatt;
e mì...speccia là, in poltronna,
che on quaj dì la vegna bonna.

E mì speccia; e mì ten dur
cont on fidegh de lion;
e, in duu annitt, d'on slanz sicur,
hoo faa el salt del Rubicon,
che fin 'dess, di salt che hoo faa,
l'è anmò l'unich caviggiaa.

Ma perchè, donna, ligass
con sto Giobb, sto strapelaa,
bon domà a moltiplicass,
pesg di scimbi?... In veritaa:
al scurtass del camisoeu
per el primm cunett, l'oggioeu,

che gh'emm tucc sott'a la s'cenna,
l'è vegnuu a la lûs del dì:
e 'l cavicc, vedend la crenna,
l'ha pensaa on cicc anca a mì,
minga in quant a squattrinà,
ma in la pâs de la mia cà.

La trottava sta casetta,
si, fasend economia,
tirand semper la carretta;
ma che bell! ma che legria!
nanca on cruzzi; e poeu sentiss
gioven, pien de firifiss.

Ma on demonni d'on malann
el me s'giacca in angonia
i duu mas'c e i tre tosann...
e me vedi a portamm via
l'ultem, pesg nè a s'giandà on fiôr,
ch'el cresseva 'me on amôr!

A pensalla che in prenzippi
no taccava la somenza...
e poeu inveci...on precipizzi!
Nanca on ann podè fà senza
de la baila bagnada!
'Na fiorida, ona buttada

de tosann!...voeunna e do
e poeu on'altra e con on'altra anmò,
de sentiss borlà giò
tutti i volt i brasc...- L'è mo
on mas'ciott?...-; e la comaa:
- No, compagn de l'ann passaa. -

Sedes, sedes! Chi t'ha faa
bonna nomena in la storia?
Per mi tant l'è on nomm grattaa,
Ch'el Signor ghe l'abbia in gloria
sto mè secol lavativ
e 'l so sedes convulsiv,

con taccaa anca si ona coa,
che nissun ghe ved la fin,
che tucc tiren de la soa
e en fann foeu el so sgabellin,
senza fed, nè religion
per sta patria...di mincion!

Ben: vorii savè 'se gh'era
in quell sedes per cà mia?
Toss asninna in primavera,
caccasangu in batteria...
e on belee, a duu mes e mezz,
la m'è morta a Concorezz.

In quell sedes gh'era dent
el rifless di sacrifizzi,
faa de tanti mè parent
per la guerra: gioj, stremizzi,
coeur sospes, semper taccaa
ai vicend di nost soldaa.

Gh'è staa dent...Si, el mè dover
de soldaa l'hoo faa anca mì,
sissignor!...Se in di trincer
gh'hoo mai miss el becch, e inscì?
con des ghej deegh de magnà
ai des bocch che gh'era in cà!

L'è vegnuda poeu la gloria
de Vittori Venet, quella
che l'ha saraa su la storia
del Carloeu, de la Zitella,
che hann cettaa l'ereditaa
del pù pesg di incoronnaa.

L'è vegnuda a famm sbatt via
mantellina, fass, baretta...
Ma in st'orgasmo, in 'sta legria,
el magon per 'na tosetta
de cinqu ann e mezz, spirada,
dopo tanto vess malada,

dopo tant sussigh adree,
per salvalla a tucc i fil,
dopo on viv domà per lee...
(la m'è morta el vint de april)
ah! che gropp, car i mè gent,
se po pù godeè de nient!

Si, crediim. Quand on papà
el dev cedegh al foppon
el so sangu...se gh'ha bell fà
a vorè dass 'na reson...
Fortunaa s'el po possà
per sfogass a caragnà,

in l'amor, faa de vertu,
ch'el gh'ha lì, in la soa compagna.
Tutt e duu, vardand in su,
se caragna, se caragna;
e in qui lacrim gh'è el soris
di angioritt del Paradis.

Se me volti a vardà indree,
la me par...ona volada;
se me vardi in mezz ai pee
e ghe picchi lì on'oggiada
ai bagaj, che cress, che magna...
la me par ona montagna!

'Na montagna senza scima
Se seguitta a andà sù, sù
se strusatterà 'me prima,
finn'al dì... - Bon dì, Monsù!
El mè corp l'è andaa in pension,
cont i vermen, al foppon.