El mè blason

EI se ciama: trinciaa de ross e giald.

El fuss almen on bon trinciaa de pippa!

Tant a la gent d'incoeu (ma che deslippa!)

questi robb ghe fann pù né fregg né cald.

Pientaa in del giald cont i sò sgriff ben sald,

col fà de chi del mond el se ne impippa,

pront a trà foeura i manegh de la gippa,

mettuu de sbiess gh'è on usellasc ruffald

cont i al sbarattaa, la lengua foeura

negher come on scorbatt. Sto diavolon

che a primma vista el par ona tegnoeura

me disen che'l sia on'aquila: vedii,

mì pensi che se quest l'è el mè blason

el pò vess domà on merlo travestii.