Faraost: on caldasc che se sofega.
No se moeuv ona foeuia
in quest'aria foghenta. Nanca on can
in gir: par che se nega
in d'on mar de voiamm; e mì gh'hoo voeuia
de scappà via, lontan.
Lontan de sto paes dove col fà
de gent seria e sapient
Arlecchin, Porcinella e Balanzon
giughen senza pudor a governà.
a fà leg e decrett, cercà provent:
tant, come semper, paga Pantalon;
dove Lelio el bosard
el diventa minister e 'l serpent
(per cambià l'è mai tard)
el lassa perd i pòmm e 'l mett la toga
de magistraa e 'l se sfòga
a mes'cià sù politica e danee.
Mì voeuri scappà via de sti pastee,
lontan de sti velen
e cercà (ma el gh'è forsi?) on postesin
dove quaidun me voeura stà visin
e famm la caritaa de on poo de ben;
dove podè anmò cred
che in de l'umanitaa se pò avè fed.