On sbagg de lûs el ciel; i nivolett d'argent

paren di bee indorment su on pascol incantaa

e i montagn in d'on vel de nebbia hinn carovann

misterios che vann, vann per l'eternitaa.

Masarada de sô la campagna la tas,

la pisocca in la pas foghenta de l'estaa.

Solla, tra i brocch del fô la scigala stonada

la fà la serenada ai popolann del praa.

Vorariss anca mì negà in sto mar de lûs,

insormentii, confus cont el rest del creaa,

desmentegamm inscì tutta la mia esistenza,

fermà 'l temp e viv senza futur, senza passaa,

inscì... ma ona scigala in del mè coeur, sfacciada,

la fà ona serenada che la me fà immatì:

e la desseda, cialla! i memori, i torment,

penser e sentiment che voeuri seppellì.