L'ospizi di vecc

Odor de verz buii,

de saraa sù, de muff,

de corp vecc che deslenguen

dì per dì; facc sbasii,

oeucc sbarattaa in del voeuj,

man che tremmen; sui bocch

senza pù dent, paroll

appenna ciccioraa

che voeuren dì nagotta.

Forsi de tant in tant

(lusnad subit smorzaa)

ghe passa per la ment

on quai ricord. E vann

(on pover rosc sbandaa)

ognidun per sò cunt

a quell apontament

che i scassarà per semper;

e l'è domà on sbadilli

fiacch de l'eternitaa.