Me disen che foo el stupid: minga vera,
son pròpi nassuu stupid, la mia gent;
che se de nò me ne importaria nient
de on bel faccin che'l sa de primavera.

Se gh'avessi nò in coo la stupidera
mi me ne impiparia di prepotent,
di lader, di politich malvivent
che hann faa de questa Italia ona ruera.

Se fussi minga stupid ridaria
de sti bei qualitaa del dì d'incoeu,
tutt ignoranza e ciarlataneria.

Ma almanch ghe doo reson inscì a la gent:
quand la ved che me cruzzi "pover fioeu"
la dis "l'è on stupid: ghe se pò fà nient".