Sira de ottober sul lagh

El tremma el lagh, basaa del sô che 'l moeur:

sgrisor rosaa. D'on campanin lontan

on concert malinconich de campann

nodand per l'aria el se intortia al coeur

(on quaicoss in de l'anima ne doeur

d'on dolor dolz che 'l porta indree in di ann).

Fioriss el ciel de stell là vers orient,

la ven la primma nebbia sù di praa;

se confonden col ciel i deroccaa

fianch de la Grigna, enorme monument

de preia, sentinella indiferent

sora i miseri de l'umanitaa.

Vegnen e vann, quietta procession,

basaa del fiaa gentil de la brevetta

contra i sass soliaa de la spiaggetta

i ond: canten l'eterna soa canzon,

ona vos in sordinna de orazion,

come de moneghell riunii a compietta.

Tribuleri, passion, speranz, dolor

se supissen, ninnaa de st'armonia,

negaa denter quest'aria de magia;

el butta dent al coeur, 'me 'l butta on fior,

on desideri bon de pàs e amor

che l'indolziss la mia malinconia...