Su la scima

In pee sora la scima conquistada

te cantet legriosa: 'l sô l'indora

i tò cavei descaviaa del vent,

el basa la toa faccia de sgalisa,

ardida e franca, bella 'me 'n'aurora,

el giuga su la « picca », bonna amisa,

fedel compagna d'ogni rampegada.

E riden i tò oeucc: riden al ciel

de cristall, allusor viv del giazzee,

a la preia superba e minacciosa,

al besbilli del vent, riden al vel

de nivolett che corren su sentee

de lûs per l'infinida immensitaa;

e la toa vôs l'è on remissell d'argent

che 'l se fa giò cont armonia gioiosa,

la toa canzon la se intortia leggera

al coeur: ona magia che l'ha portaa

in del mè inverno on fiaa de primavera.