Madamm, gh'hala quej noeuva de Lion?
massacren anch adess i pret e i fraa
quij soeu birboni de Franzes, che han traa
la legg, la fed e tuttcoss a monton?

Cossa n'è de colù, de quell Pétion
ch'el pretend, con sta bella libertaa,
de mett insemma, de nun nobiltaa
e de nun damm, tutt quant i mascalzon?

A proposit; che lassa vedè
quell cappell là che gh'ha d'intorna on vell...
Eel staa inventaa dopo che han mazzaa el rè?

Eel el primm ch'è rivaa? Oh bell! Oh bell!
Oh, i gran Franzes! Besogna dill... No gh'è
popol che sappia fà i mej coss de quel