I campann

Incoeu tucc parlen, tucc se fann sentì

e nun per contentai disom de sì,

però quand i campann sentom sonà,

per scoltai piantom lì de cicciarà.

L’è la vos s’cetta d’on amis che ciama

anca se l’è prest e semm in pigiama.

Par de sentì batt el coeur de la Gesa

che di debol l’è semper la difesa.

I campann fann capì i avveniment

senza perdes in tanti compliment.

Inscì gioissom quand sònen a fèsta

ma per on’agonia sbassom la tèsta.

Quasi ven voeuja de parlà con lôr

perchè convincen in alt el Signor

de sonà semper per quajcoss de bèll

e men che men de mòrt o a martèll.

Ma quèst, purtròpp, domà l’è on desideri

per vegh la vita senza tribuleri.

Sien i campann la nòstra compagnia

per viv con tanta pas e on poo de legria.