Ona vôs

Quanti vòlt in coo d’on dì
tanta gent sentom parlà,
nun fèmm mostra de capì
ma de rar ghe dèmm a trà.

Però quand sèmm sol solètt,
foeu del mond e di frecass,
la vôs scoltom che in segrètt
in del coeur nun sentom nass.

L’è la vôs pussee sincera
e la pesa i nòst azion
per poeu dì a la soa manera,
s’hinn cattiv oppur s’hinn bon.

Ogni tant la se lamenta
se on poo tròpp s’emm lassaa andà
però in fond la se contenta
de quell pòcch che pòdom fa’.

Se i oeucc stracch stann per sarass,
pian pianin ‘mè ‘l fuss nagott,
l’è bell proppi indormentass
quand la dà la “Bònna Nòtt!”