Visin al camin (Ferruccio Lanzani)                                                          

L’è bèll d’inverno attorna al camin,
di legn che brusa sentì la fiammada
con lì sottman on ross biccer de vin
per bagnà ‘l becch dopo 'na cicciarada.

Intant che foeura ven giò la fiòcca
fina a quattà tuttcoss de bianch candor,
par de sentì ona veccia filastròcca
che la tocca domà i cord de l’amor.

Per el camin va su el fumm legger
e nun che semm intent a fà flanèlla,
ghe lassom corr adree i nòster penser…
forsi voeuren scoprì in ciel ona stella.

Ona stella magari piscininna
ma ch’el sia on poo per nun el so splendor
perché quand dervom i oeucc a la matinna
el sberlusissa el nòst grazie al Signor.