Me piasariss vess bon
de disegnà
Per fatt cont i mè man
el tò ritratt.
Fa on salt indree in del temp
cont el penser,
per rivedett tal qual
come quell dì,
che seri là distes
in sù la paja
consciaa compagn del strasc
ch'el gh'ha 'l moletta.

Crocerossina tì
coi bei paròll
che suggeris de cert
la compassion,
dò fett de panetton
te m'hee slongaa,
e on gavettin de latt
inscì tant cald.
M'hann faa rinass in mì
la gran speranza
de viv ma de cristian
la mia vita.

Crocerossina senza nòmm,
sorella che consola
la vita tormentada
de tanta pòra gent...
el tò faccin tant bell de Madonnina
l'è denter del casett di mè memòri.
De l'ospedal arent al front,
per mì la sè fermada
domà la part che speggia
i to maner gentil.