Cavaj e progrèss

Oh bej cavaj che gh'hii quart e garon

e s'cèna e colI e muscol strapotent,

parlemm on poo de vialter bei stallon,

cavaj de monta e tir, cavaj de monument.

Vialter sii campion, sostegn e fior

de tutta quanta la razza cavallina,

cont el dovuu rispett ai corridor,

ch 'hinn bej de vedè corr a la mattina

e filà dree a la legora e i segus

per strad e bosch e praa lusent de brina

con foeura tant de lengua e s'ciuma al mus,

tra lamp e fumm e spar de carabina;

portand cont e marches in caramella

col cardanell e rossa palandrana

offiziaj cont el bust e ona quai bella

damazza coi stivaj e la sottana.

Hinn bej anca de vèd a l' Ippodròmm,

al Trotter e a la pista de San Sir

e con che gust ghe se mett sù di sòmm

pur che se gh 'abbia la fortuna a tir!

Ma scoltee fioeu... questi cavaj de corsa,

sti animai de lusso e de caprizzi,

che a compraj e tiraj sù ghe voeur la borsa

senza fond come el pozz de San Patrizi,

al dì d'incoeu gh'hann pù de utilità.

A l'è inscì belI che gh'era el cambi a i pòst

adree a la strada fra città e città

per viaggià in pressa senza fa di sost!

E l'è passaa anca el temp di cavalier

che andava a la ventura disperada

tegnend a la man dritta el sò destrier

e sotta el palafren per fa la strada

con dedre via i scudier sora i ronzin.

I cavaj eren bon per tirà pes

e rimontà i barcon sù dal Tesin

fin al laghett de Porta Ticines.

Allora andaven, taccaa sotta a i bar

cargaa de gèra, su la provincial

senza posass de nott al scur, o al ciar

cont el sò, la scighera o el temporal;

ma incoeu, in tutt i servizi, a pocch a pocch,

sta pòra bestia, l 'hann missa in d' on canton,

la voeuren nanca pù per fa i traslòcch

o portà el ruff da i part de Vimodron.

Col progress, tutt se porta col forgon;

el latt, la posta, i mòrt e i arrestaa,

i "container", te scarghen el vagon,

giust a pontin, su l'uss de la toa cà.

E daga donca el pass a l'automòbil,

a la Fiat, a la Opel, a la Ford

però de tì cavalI, animaI nobil,

vegnarà mai a men el bon ricord.

Quand se ved ona sciora sul quintal,

larga de spalI e cont i pee on poo grand,

che la svergna on fetton fenomenal,

se dis "L'è ona cavalla del Gondrand".