Strada de la carità

Strada de la Carità

me ricordi de tosetta,

on odor de cicolatta,

quand che stavi lì de cà!

On misc-masc de patanitt

che giugava a "te ghe l'heet'',

che cantava filastrocch,

che sognava la citaa.

La mia cà in su la ringhera,

uss a uss tanti destin

in del cortil ona magnolia

l'ha pientada el mè papà!

Strada de la Carità

te parevet foeura man,

el cors Lod l'era on paes,

in del noeuvcent voltes indree!

El soris d' on bell tencin

dedree ai veder d' ona porta

forsi l'era el prim amor

chissà mai che fin l'ha faa!

Rivedè el sò bell musin

quij manitt bianch come el latt,

carezzà i mè trezzitt

per robam a mì on basin.