Rondin a Stazzona (Villa di Tirano - SO)

A Stazzona sul sagraa

gh'è on pianton de castegn d'India

che 'l ghe fa de sentinella

a la gesa parrocchial:

ona guardia gigantesca

de misura ecezional.

Sant Abondi protettor

l'è 'l resgiò che ne disponn:

ghe l'ha dada in dotazion

a on gran rosc de rondinell

che d'estaa se incontren lì

in qualunque ora del dì.

Par de vess in cantoria

quand gh'è i proeuv de la coral:

chi fa el primm, chi fa el segond,

chi fraseggia in terza vos

e i cantor, sconduu dai foeuj,

fann parè 'sto belI pianton

on gran magich carilion.

Musicant hinn i campann;

tocca - poeu - a la meridiana

batt el temp con la bacchetta,

che fa l'ombra sul quadrant,

sott ai oeucc del don Cirill

che 'l governa el marchingegn

di reciocch che onòra i sant.

Ma quand pioeuv, giornada trista:

cantoria tutta voeuja

e la vos del campanin

che 'l ripett la filastrocca

- dodes volt del dì e de nott ­

come 'l voeur el sò destin.