Sinfonia de basitt (Mario Comolli)                        

Sinfonia de basitt

In del basà gh'è gent che sara i oeucc,

gh'è quell che intant ch'el basa el trà on sospir,

gh'è quell ch'el basa-su 'me on passional

e chi dà via basitt 'me sovenir.

Ogni mamma la basa el sò fiolin

che se le streng, beatta, contra 'l sen;

gh'è semper bocch in cerca d'alter bocch

che de basà no poden fann a men.

Basitt sora la terra el manda el sô,

lontan gh'è l'orizzont ch'el basa el mar,

anca i montagn, coi scimm, basen el ciel,

de basitt l'univers l'è minga avar.

In tutt el mond l'è questa l'armonia:

basitt, basitt per tucc. 'Na sinfonia!