Armonii d'amor

In d'on moment de pas
e de ripos
denanz a la Madonna inghirlandada
de lumitt e de ros,
là, sola, ingennoggiada,
t'hoo vist come in d'on sogn!
Sconduu in mezz ai ombrij
de la navada,
el coeur el s'è dervii
e anmì hoo sentii el bisogn
de lassamm andà giò
pian pian in sui genoeucc,
visin a tì
a contemplà
con l'anima in surbuj
e on vel
de commozion denanz ai oeucc
la toa faccetta che guardava el ciel!
De foeura intant
sonaven i campan
de la benedizion,
e in gesa i salmodij
di pret e de la gent
se mes'ciaven pian pian
cont i armonij
dell'orghen sberlusent!
A pocch a pocch el mond
el s'è confus
in d'ona nebbia pienna de color;
poeu hoo vist sparì l'altar,
i baldacchin, i ciar;
e, in fond,
come in on mar de lus,
de stell,
de nivolett d'argent,
i noster coeur
s'hinn strengiuu
in d'on coeur sol,
e i labber s'hinn dervii
senza vorell
per regordà duu nomm,
i noster nomm,
squas a pregà
pussee ancamò el Signor
de benedì dal ciel
el nost amor!