Serc in su l'acqua

Quand seri anmò
on bagaj,
me piaseva trà dent
i sass in l'acqua
per guardà i serc
slargass foeura,
e poeu cuntaj
finna a vedej,
lontan,
svanì in del nient.

. . . . . . . . .

Quanto temp l'è passaa!
I sass, adèss,
hinn diventaa
di vers
buttaa là, inscì
squasi per scherz,
con l'illusion
de 'vèggh di ròbb de dì,
e l'intenzion
de dì quejcoss de bon

. . . . . . . . .

Se'l sarà minga inscì,
per colpa mia,
avaroo faa ancamò...
serc in su l'acqua
che sparirann
nel mar de la poesia
senza fà dann...!