Carneval            

(in cà de lo Francesca)

                   I

Perchè tutti sti mascher, sti figur,

che paren pastrugnaa cont on pennell?

Che sconden sòtt i strasc i slisadur

e quatten i magagn cont on mantell?

Perchè l'è Carneval e l'è pur belI

andà come se và, tra'l ciar e scur,

indormentass senz’anima e cervell

e liberass di sògn e di paur.

Su con la vita! Adess sèmm minga a quella

de gòd sta libertaa senza confin?

E allora sòtta, gent, a voltà vella!

Cambievess, a la faccia del destin,

la maschera che piang de Porcinella

con quella che la rid de Truffaldin.

                    II

Tasen i mur. Sabet grass l'è passaa.

Finii el spettacol. Pù de mascherinn

che se stimaven dent in di vedrinn,

pù de carr coi scalmann organizzaa

per daghela on poo voncia a la cittaa

Finii tusscoss. Se smòrza i lampedinn

de la mattana, come tant pedinn

d'ona collana del bon temp andaa.

On alter sabet grass l'ha faa i valis,

e la cittaa la corr anmò a intanass:

quaresima l'è chì, vestida in gris.

Tasen i mur. Dedree di pòrt saraa

se sent domà on trombon. Dopo i frecass,

Milan el ronfa, bell e indormentaa.