La protesta di angiol

Intanta che fasevi on bèll sognin:

me son trovaa, settaa in Paradis

in mezz a on bordeleri de Angiolin

che reclamaven, con el San Luis,

perchè voreven fà l'agitazion

per fass aumentà la provision.

Voreven - 'sti baloss - che ghe fudess

la comission interna, sindacaI,

che dent per dent, la ghe concedess

de fà, quell scioperin settimanal,

o fa l'orari curt, 'me qui sottann

che porten ancamò, certi tosann.

Pareva nanca pù de vess in ciel!

De tant che seguitava 'l gibileri,

perfinna la Madonna, senza vel,

la pizzigava denter, San Gliceri.

per fa, che con l'ajutt de San Vittor

podessen fa tasè, i contestador.

Vun, el voreva vèss salvaguardaa

di ris'c, che ghe procura la discesa,

e l'alter, el voreva vèss scortaa,

in cas de legittima difesa,

e gh'era chì, voreva la mancina

perchè 'l vegniva giò... senza benzina.

Intant che seguitava 'I baccaneri,
ho vist a comparì, de gran volada
el nost Signor, che senza fa misteri
a l'era lì, per dagh 'na remenada...
ma poeu, pensandegh sù con compiacenza,

el gh'ha concess de fa... la penitenza.

Me par d'avè capii, che là per'ari:

el sia minga el sit de protestà,
e nanca, de podè scurtà l'orari,

inscì, ghe pensi sù se gh'hoo de fà...

Morì, bisogn morì. L'è natural!
Ma voeuri... la tariffa sindacaI.