L'orbin de Dugnan

Quand......
Te se regòrdet? L'era
la primavera del quarantatrii.
I ann mai-pù fenii
della guerra che avevom no voruu.
Dopo, saria vegnuu
(i todèsch gh'eren) i repubblichin,
la Muti, i SS...
(Ma del rest, anca adess, gh'emm la Volanta
Rossa che, tant e tant... Ben, lassa corr
tutt quistion de color... E beato tì
che, quji robb lì, tì te je vèdet minga ...)

Donca,
la mattina che hin
vegnuu a toeu-sù i campann e a portài-via...
O la malinconia della giornada
prima! La scampanada:
l'ùltema scampanada, a concert pien!...
Ancaben che tì, orbin, te l'ee nò vista
quella partenza trista,
però t' ee sentii el gropp
del magon; e, quji fopp, te j' ee sentii
ras e impienji de lagrim...

Quand, poeu...
Mascarada de lùj;
rebùj e baraonda;
sudor che gronda sottavia ai costumm;
fumm de incens e de vin...
Quand hin tornaa i campann del concert noeuv-
novent e barlusent,
ti t' ee voruu pertend on postajoeu
in su on carr, anca ti;
e t'an mascaraa-sù, compagn di alter...
Ma - alt, in su quel carr; fermo e compost,
al tò post - tì, te sèret nò ona maschera...

E infin
(pret e pùji mai sagòj) el campanin
noeuv: per i campann noeuv!
Vuna 'dree l'altra, a pian,
i àn tiraa-sù: campann e campanon.
Emozion della gent
(no se sent a fiadà)
ferma a guardà: che la se deslontana
- la campana - on trattin e poeu on trattin,
sù sù, in sul campanin noeuv, al post noeuv.
Per arj, incontra al ciel.

.                          ***

...O che bell ciel de Ottober, lavaa-foeura,
che par fina che el voeura fà-via tutt
el gramm e el brutt e el tòrbor e el nebbiaa..
o che serenitaa ciara de autun !..

                            ***

No gh' è nissun che fiada; ma l'orbin
el guarda in alt, come on fiolin. E el rid...