L'ultema scampanada

Campann che sona in grand,
che sona in agonia,
campann che sona a mort!
Doman ve tìren-via
per orden del Brigant...
O campann, sonee fort:

sonee, campann! Chissà
che la popolazion
la intenda, finalment,
la significazion
del voster scampanà:
a mortorj, a spavent!

L'è el foeugh, l'inondazion,
i tass, el terramott,
la pesta, la vergogna,
l'onta de vess traa biott,
de' deventà barbon,
de vess miss alla gogna,

de dì in dì, de ora in ora,
de minutt in minutt:
semper de pù 'e de pù!
L'è tutt 'sto viv,
'sto brutt vivattà de malora,
'sto viv de taccaa-sù,

de impiccaa, de tradii,
de bozzaraa; 'sto viv
de lader, de teppista;
'sto viv de lavativ
che l'è mai-pù fenii;
'sto viv de Era Fascista!

Foeura, gent de Dugnan;
foeura a scoltà i campann
che incoeu scampànen questa:
sonada del malann!
Eja, din-don, din-dan;
eja! Campann, a festa!

...Campann. doman - traa a terra -
andarii in del Tonoll,
Trovarii i monument
de quji che hin staa tant cioll
de morì in l'altra Guerra:
La Guerra del noeuvcent

quindes- noeuvcentdesdott!
Là, trovarii i Soldaa mazzaa
de man tognina
e, de man nostra, traa
anmò per terra e rott
a tocch, ancamò... .Fina

che rivarà el sò bravo
orden de fà passà
tuttcoss in fondaria
(memòri, sant, de Cà,
tradizion...) e s' ciavo!
... Campann, sonee a angonia!