Per che costrutt ?  (Giosafatte Rotondi) 

 

Testo originale Traduzione

 

Per che costrutt? - 25.10.1941
(al mè fradell - mòrt in dell'altra guerra - el dì dell'anniversari)

Vun adree l'àlter, pàssen
i ann. Pàssen o cròden-
via i ann? Hin vintises,
incoeu, Gino!

La gesa
l'è lì ancamò. L'è voeuja,
(L'Offizzj àn poduu minga
fall dì, quest' ann, che gh' era
minga de prét).

La Mamma
la gh'è ancamò. L'è orba
quasi del tutt, .la Mamma:
e la tramonta-via
con la malinconia
dell' autun, dell'inverna,
della scighera trista...

Eppur
quji oeucc che ghe ved minga
vèden, anmò, quajcoss.
Vèden anmò el reciamm
seren dell'altra sponda.
Guàrden all'al-de-là!

Te vèdet? Mì. la Mamma
quasi la invidji, incoeu;
perchè l'è liberada
(quanto pussee de mi!)
de ogni ligamm al mond,
de ogni entusiasmo. de ogni
idealitaa. che fùssela
pur stada ona reson.
'almen. de' tirà-là.
La volta-via in tristezza;
ma la gh' à pù nagotta
(di copp in giò) de vèssegh
ligada anmò on trattin.
La pensa (semm d'accord)
a sti ligamm: la proeuva
dolor a regordass;
.ma ghe j à pù - capìssét? -
ma el dent l'è foeura, infin!

.Mì, no. Mì, gh'ò bell pari
a dì che gh'ò faà el call
(e ghe l'ò faa) ai miseri:
al marsc, alla bruttura
d'incoeu... Mì gh'ò bell pari
a dì che me ne freghi
.de quell che la sarà
la bruttura e la marscia
de doman; che - succeda
pur quell che voeur succèd -
mì me ne batti l'anima....
Mì gh'ò bell pari!.. .

Forsi
son minga vecc assee,
mì che me par - ormai -
de vess inscì-mai vecc.
Tropp e tropp pocch. L'è tragica
la sorta mia-de-mì

P'r esempj, mì, 'sta guerra
a fianch della Germania
voraria sopportalla -
come la fa la gent.
Che, defatt, la sopporta.
Come ona tassa noeuva;
come ona rogna noeuva;
come on àlter botton
infilaa malament
in della bottonera
sbagliada al botton primm:
come ona grana noeuva
del rosarj di guàj,
che el rézitom ormai
tutt'i dì, de vint ann...
Rosarj di misèri
rosarj di Mistèri
doloros!
La gent la se sopporta
anca i tògnitt in cà
(rassegnazion? chissà?)
e la sopportarà
(tant, coss te voeuret fà?)
doman i angarji
noeuv di tognitt patron...

Oh. beatta 'sta gent
soppressada di bott,
se i bott hin staa la cura
per adattass ai bott!...

Mì, no - .vèdet? - Me cruzzi,
mì de 'sta guerra, invece.
Mì, no - vèdet? Mì podi,
minga desmentegà
quell'altra Guerra...

...quella
che èmm pagaa cara in cà;
ma che - e Mort e viv -
l'èmm inscì-mai sentida,
del primm moment all'ùltem!
Mi, i Mort della mia Cà
(el primni Te see staa Tì)
mì, me par de tradji
. - i mè Mort - a reagì
minga con tutta l'anima
a 'sta profanazion!

(Gino, l'è vintises
ann, incoeu, delIa Toa
mort, in quell'altra Guerra:
in quell'altra, in quell'altra!)

Quand Te see mort, nissun
de nun (nanca el Papà
- por omm! - inscì straziaa)
s'è dimandaa perchè
te sèret mort. Perchè
tutti savèvem (tutti:
anca la Mamma, an-lée)
che,  in fond,
ona reson la gh'era:
gh'era on fregùj de fed
(o se credeva); on poo
de ideal, infin !

...O se credeva - hoo ditt...
Ma incoeu, cont i tognitt
a fianch, per fabbricà
insemma l'orden noeuv,
incoeu la sbottiss-foeura,
la domanda tremenda.
Perchè, Fradell. perchè?
Perchè mai Te see mort?
A che scopo, a che fin?

Per che costrutt mè Pader
(Tò Pader) l'ha piegaa
el coo alla volontaa
del Signor: al destin
d'Italia, alla giustezza
- e, insemma, alla giustizia -
dell'altra Guerra?

(Tropp giovin e tropp vecc:
tropp vecc per adattass,
tropp giovin per reagì.
Tropp coraggios e tropp
cagon, in fin dell'ascia),

Oh, la caca,
che in l'Era tesserada
la s'è ancamò vanzada
senza tesserament,
l'è el simbol mè-de-mì!
Sìmbol di Italian:
che pèna che patiss
che piang perchè capiss
che doman la sarà
pesg ancamò de incoeu
(per i noster fioeu
pesg che per nun anmò):
che capiss, ma però
gh'à minga la fortuna
de adattass, pensand pù:
nè gh'à la dignitaa
de reagì, in nobiltaa...

Gino. vintises ann
come incoeu, Te see mort
per l'Italia, E mì
incoeu son chì, son chi
per vedè sputtanada
semper de pù - de dì

in dì - 'sta por'Italia...
...Son chì, senza reagì,
de dì in dì, de dì in dì...

 

Commento

 

Invia i tò penser, i tò emozion (anca in italian o ne la lengua che te par)